بارليه فوه أون فرانسيه؟ (2)

اللهم لا شماتة.. لقد وقع فيما يبدو القائمون على التعليم في مصر ضحية مقلب فشر المقلب الذي شربه اتحاد الكرة في المسيو جيلي..وصاحب المقلب هم الفرنسيون مؤلفو كتب الفرنسية الموجهة لطلبة المراحل الثانوية المصرية..

أول استنتاج تخرج به من قراءة تلك الكتب أنها صممت لبلد آخر غير مصر، رغم أنه يفترض أنه في تعليم لغة جديدة ، أن تحاول تقريبها للمتلقي عن طريق استعمال كلمات وأشياء توجد في المجتمع المحيط به.. من الأشياء الغريبة مثلاً أنك تجد مثلاً شيئاً اسمه البطاقة المدرسية ، فيه اسم الطالب وصورته وسنه و...و.... هل هذا الكلام موجود في المدارس الحكومية المصرية يا جماعة الخير؟.. حتى شكل الشهادة الدراسية اللي في المنهج غريب الشكل!..

وحتضحك أكثر لما تشوف قوائم الشراء بالمراسلة في درس يحمل نفس الاسم acheter par correspondance.. شووووو بيعقد!

يا مسيوهات.. كلمونا بالهجايص الله لا يسيئكم.. انتو ما نزلتوش مدارس حكومية قبل كدة؟ ما مشيتوش في أي شارع في المحروسة؟ ولا التعليمجية قرروا تحديد إقامتكم في مدارس الفرير والسانت فاميي؟.. بقى بذمتكم المدارس اللي فيها 60 و 70 طالب في الفصل بتعمل carte scolaire للطلبة بتوعهم؟ يا مثبت العقل والدين ياااااااا رب!

وعلشان ما يتقالش إن احنا سايبين مناهجنا للعلوش الأوغاد يعملوا فيها ما بدالهم من غير ما حد يقول لهم تلت التلاتة كام ، لازم التتش المصري يا جماعة.. في كل امتحان أو نموذج امتحان لازم إجباري زيارة أو افتتاح للسيد طويل العمر يطول عمره ويزهزه عصره وينصره على مين يعاديه (هاي هيء!) .. والغرض من دة فيما يبدو القضاء على أي أجسام مضادة تتولد لدى الطلبة نتيجة الإلحاح المستمر على زيارات سيادته في التليفزيون والإذاعة والبوتاجاز والغسالة.. وعلى سبيل التغيير نجيب افتتاحات السيدة الأولى ، أو أي وزير .. برضه احنا لازم نوعي الطلبة وطنياً وقومياً .. علشان ما يطلعش للطلبة موقف (زي الدمل كدة) ما يعرفوش يخرروه (زائد إن المراهم السودة القديمة ما عادتش بتتطلع)!

أنا مشفق على الطلبة الغلابة من اللي بيتعمل فيهم وفي عقولهم..

يفضل بقين محشورين في الزور : يا تعليمجية ، ياللي بتفخروا بإن عندنا خبراء على أعلى مستوى (الكلمة اللي جابتنا الأرض) ، ياللي بتحفظونا في وسائل الإعلام إنكم الوحاد اللي طورتوا التعليم في العالم.. ليه ما شمرتوش السواعد وجبتوا واحد كدة خبير على أعلى مستوى من اللي بتتعايقوا بيهم وعملتوا مقررات للغات تصلح للاستهلاك الآدمي وتلائم المصريين اللي همة بني آدمين زي الفرنساويين والإنجليز (لولاش انتم) .. ولا حتقولونا : الكدب خيبة .. إحنا أعلى مستوى آه بس مش للدرجة دي!

كشفت راسي ودعيت عليكم يا تعليمجية .. بالعربي والانجليزي وباللغة الفرنسية.. حسبي الله ونعم الوكيل..

خارج الموضوع : وزارة التربية والتعليم من أكثر الوزارات دعاية لنفسها ، ومنظر الوزارة وهي بتقوم بالدعاية لنفسها داخل مناهجها زي منظر اتنين متجوزين من كام عقد من الزمان ومع ذلك بيدلعوا بعض وبيتغزلوا في بعض في الجلسات العامة زي المراهقين.. حاجة تقرف..