Tuesday, July 11, 2006

بص العصفورة!

ما هي حكاية "العصفورة" في مصر؟ .. عندما نسخر من جهل شخص نقول عليه "داقق عصافير" ، وعندما نتحدث عن "المصادر المطلعة" نقول "العصفورة قالتلي" ، وأخيراً في الأفلام الكوميدية عندما نسخر من عبط بعض الناس يشاهدون في مشاهد الخناقات المكررة والمعادة في تلك الأفلام والبطل يقول لهم : "بصوا العصفورة"!

بيروقراط وزارة التربية والتعليم لم يتعظ بعد من دروس الماضي ، ويمضي في السخرية من عقولنا جميعاً لآخر الشارع!

في إحدى حلقات البيت بيتك ، وفي تصريحات أخرى يبرر البيروقراط صعوبة أسئلة الثانوية السامة بقولهم أن المدرس الخصوصي يمرن الطالب على نموذج معين من الامتحانات وإن جاء الامتحان مخالفاً له ظهرت الشكاوى!

كلام يفترض قائله البيروقراطي في السامع أنه يدق على رأسه عش عصافير بكافة مستلزماته!

وستعرف وبنفسك من الذي يدق العصافير على رأسه ، عندما أذكر بأن واضعي الدروس الخصوصية يستشهدون في امتحاناتهم ، وأصحاب الكتب الخارجية في كتبهم ، بالامتحانات السابقة التي وضعتها الوزارة المصون ، ومن ثم فإن المدرس الخصوصي يمرن الطلبة على نماذج امتحانات الوزارة ، وليس على نماذج افتكسها من قعر جمجمته ، والغريب أن هناك توافق بين شكل امتحانات العام التالي وبين امتحانات السنوات السابقة التي حفظها الطلبة عن ظهر قلب ..

والشيء المشترك بين المدرس الخصوصي وانكشارية الوزارة هو أن الامتحان هو الغاية ، وليس مجرد وسيلة للحكم بها على تحصيل الطالب وفهمه للشيء أبداً..هذا للعلم..

تصريحاتكم مكررة يا فقاقيع الرابسو ، ومن الوقاحة أن تتعاملوا مع باقي الشعب المصري بمثقفيه وبسطائه على أنهم يدقون العصافير على رؤوسهم في الوقت الذي نرى فيه على رؤوسكم عدة بطحات تعشش فوقها .. عصفورة!

6 comments:

مـحـمـد مـفـيـد said...

كل حاجه في مصر تندرج تحت بند انا داقق عصاقير مش بمزاجك غصب عنك

قلم جاف said...

محدش قال حاجة ، لكن عايز حد يجيب لي مبرر يتعامل به أي بيروقراطي ماسك منصب كبير في وزارة بكل استحمار مع سبعين مليون مواطن بيدفعوله مرتبه وبدلاته من ضرايبهم؟

Ossama said...

حقيقي ليه كل الحكومة والصحافة والاعلام المرئي بيعتبرونا داقين عصافير او لا مؤاخذة خارجين لتونا (حلوة لتونا ديه قوي زيّ الكتاب الكبار)من ام الخانكة او العباسية او في افضل الاحوال قسم الامراض العقلبية بمستشفى درنكة المركزي؟؟؟
ده بجد سؤال مش تعليق
لأن فعلا هي حاجة تحرق الدم
وخصوصا ان الحاج فتحي في البوست السابق لهذا قال انه كان حيعاقب مدير مدرسة آلاء
والنبي ايه يا بتاع سيد قراره؟؟
واحكام القضاء بالتزوير واهدار العضوية .. و... بجد ليه ؟؟
هو حقيقي المصريين داقين عصافير ولا كلنا بنركب الافيال
حد يفهمني

Abdou Basha said...

عندما يكون الاعتماد - كل الاعتماد - على امتحان واحد في نهاية العام فهذه مأساة .
المفروض إنه هناك إعداد بحوث مصغرة.. ومقالات..وقياس تفاعل الطالب.. وحضوره.. كل هذا من المفترض ان يسجل في النتيجة النهائية .
لكن التعليم في مصر لايعترف بهذا قريبا، ويتضح هذا الأمر في المدارس الأمريكية (الدبلومة الأمريكية) التي من المفترض أنها تعتمد هذه الوسائل التعليمية، لكن الطبخة تظل في النهاية ذات مذاق مصري .. وغن كانت أفضل من المدارس الحكومة او العربي بمراحل .

قلم جاف said...

أثرت نقطة في منتهى الخطورة ياأبو باشا..

إيه قيمة إن الوزارة ورابسوها الموقر يقولوا من هنا للصبح إحنا حنطور التعليم وحنخرج بيه من الحفظ للتلقين للمش عارف إيه .. وانت لا بتدرب ولا بتطور قدرات معلمك..

مفيش معنى إذن لقصة الكادر الخاص إلا إنها "اطعم الفم تستحي العين".. ودة اللي عايزه أي بيروقراطي..

دي حاجة..

حاجة تانية : كثير من اللي ليهم في السياسة ممكن يعلقوا على الاستهزاء المستمر من كل رابسو بعقول الشعب لأن الشعب ما انتخبهمش .. وأنا مش معاهم في دة بالمرة .. السبب الحقيقي هو المؤسسة اللي جه منها رابسو ، وعقلية رابسو البيروقراطية حتى ولو ما كانش بيروقراطي .. سياسة قائمة على إيهام "الأعلى" بتنفيذ محتويات تعليماته بحذافيرها ، والإيمان المطلق بالسلطوت على كل من تحته ويدخل في اختصاصات وزارته..

حاجة أخيرة وعايز أناقشكم كلكم فيها وجايز أكتب عنها في موضوع مستقل .. يا ترى لما سيادتك يارابسو يا بو الفقاقيع تعلي مدرسة ورا مدرسة .. هل دة اللي حيحل فعلاً أزمة التعليم؟

moorgen said...

قلم جاف
انت اصلا بتتكلم فى ايه
اسوء نظام تعليم فى العالم هنا
وبالنسبه للطلبه والمنهج
والمقرر الطالب يعتمد على نظام المذاكرة عشان الامتحان مش المذاكرة للتعليم
وبالنسبه للثانويه العامه اللى الطالب يذاكر عشان فى الاخر يجيب مجموع يكتشف ان بعد الامتحان النيجة ما لهاش حل
حاليا اللى يجيب 96% مالهوش كليه
عدله يدخلها
كدا لازم تبص ع العصفورة غصب عنك