Saturday, February 10, 2007

تاج من إني راحلة ، وتاج ليكم..

خلال فترة التوقف بعتت لي إني راحلة تاج جميل بتطلب فيه مني كتابة التلات سطور اللي بعد السطر الخامس في صفحة 123 من آخر كتاب قرأته..

في الواقع ، كنت في فترة أجازة في بورسعيد وكنت بأدخل على النت من سايبرات متفرقة ، وما أتيحليش أقرا التاج بدقة .. ففهمته على أساس كتابة السطر الخامس نفسه.. وآدي السطر :

ولكنه شجعني ، وكان أكثر واقعيةً مني ، فقال : عندما نصل إلى القاهرة نهرب من الجامعة ونتفرغ للغناء والطرب .. ولا دراسة ولا زفت!

السطر من كتاب عاشوا في حياتي لأنيس منصور .. والمقصود هنا هو جمال أبو رية ، وهو وصححوني إن أخطأت والد الممثل كمال أبو رية ..

والتاج أسلمه بالمناسبة لساسو ، عبده باشا ، شريف نجيب ، وزمان الوصل..

أنا بقى اللي عندي تاج وعايز أسلمه بنفس الطريقة!

هل كنت أو كنتِ طالب(ـة) شاطر(ة) في المدرسة والكلية؟

إيه كانت أحب مادة وأكره مادة ليك(ـي) في المدرسة والكلية؟

وكنت أو كنتِ عايز(ة) تطلع(ـي) إيه وانت أو إنتِ صغير(ة)؟

إجاباتي:

1-في الابتدائي فقط كنت طالب شاطر ، متوسط إلى متواضع في الإعدادي والثانوي ، جيد داخل الجامعة باستثناء الإحصاء اللي شلتها (والغريبة إن كل واحد أحكيله عن الموضوع دة يقول لي : هوة حد بيشيل إحصا اليومين دول في كلية تجارة؟)

2-كنت بأتململ من الجغرافيا وأنا صغير ، الرياضيات كانت عقدتي في الثانوية العامة بسبب المدرس اللي كنت بآخد عنده .. وطريقة تدريس الرياضيات والفيزياء كانت تكره الواحد في حياته..

في الكلية اكتشفت إن بعض الكلام الفارغ اللي درسته في الرياضيات له معنى وله استخدامات ، بدأت أحب رياضيات الأعمال مع إني ما كنتش شاطر فيها ، حتى الإحصاء اللي كنت بأكرهها علشان شلتها حبيتها وبشدة بعد ما تغيرت وجهة نظري عن التعليم إلى الآن أثناء الكلية ، ولذلك قصة طويلة..

3-زي معظم الأطفال كانت أمنيتي أطلع دكتور ، حبيت البرمجة لكن الباب اتسد في وشي بسبب مجموع الثانوية العامة بما إن دراسة الكمبيوتر ما كانتش متوفرة أكاديمياً إلا في كلية الهندسة ، وما إن دخلت تجارة من هنا حتى فتحت كلية الحاسبات والمعلومات وبرضه كان مجموعها كبير..

هذه كانت إجاباتي .. وأمرر التاج لكل من :


فاصل ونعود .. الكلام اللي جاي كتير ، ويمكن يبقى كبير :)

4 comments:

Sharm said...

يالا كل تاج وانت طيب

saso said...

:)
ما كنتش اعرف انك اتخرجت من كليتنا اللذيذة دي.. والله حبيتها في رابعة وبعد ما خلصت اوي

علي الأقل ماكانتش مزعجة وبتجبرك تركز في اتجاة واحد

ميرسي علي التاجين.. واجازة سعيدة

قلم جاف said...

وانت طيب يا شارم.. :)

الأجازة خلصت يا ساسو ، وأنا رجعت بقالي كام يوم .. والواحد اتفسحله شوية وقضاله كام ساعة حلوين .. أحسن من مفييييييش!

Me2 said...

آسفة على التأخير
وشكرا على تمرير التاج
تم عمل اللازم :)