سألت تلميذة طفلة "نجيب الريحاني" في فيلم "غزل البنات" عن سر الجمل الحوارية التي ترد على لسان الأسد في موضوع قراءة -تقريباً القراءة الرشيدة اللي كان شغال أيامها قائلةً : "هوة الأسد بيتكلم؟".. فباغتها بهذه العبارة.. "أيوة بيتكلم .. بيتكلم.. وزارة المعارف عايزاه يتكلم"!
حسب علمي لم يحضر "الريحاني" العرض الأول لـ"غزل البنات" لسبب بسيط جداً وهو أنه توفي قبله.. ولو عاش إلى الآن لعرف أنه إذا كان الأسد يتكلم في المناهج الدراسية وقت عرض الفيلم لأول مرة - ومش عاجبنا - فإن الغابة كلها تتكلم الآن!
السبب في ذلك هو أن العملية التعليمية تم استغلالها لفرض "ذوق سياسي عام" وثقافة بعينها على مدار العهود السابقة وربما إلى الآن.. بشكل مباشر وغير مباشر..من مواضيع كتب القراءة إلى مواضيع مقررات اللغة الفرنسية إلى مواضيع التعبير والنحو .. ولا ننسى التاريخ.. وما أدراكم ما التاريخ الذي يتم فيه رفع أناس لعنان السماء .. وخسف الأرض بآخرين..
أنا عن نفسي أرى أن التعليم المصري مُسيَّس..ولا يَلقَ ذلك أي انتقاد رغم خطورته!
نعم هناك قيم إيجابية ثابتة لكل وقت يجب على التعليم أن يسهم في نقلها للصغار .. لكن هل إلى الدرجة التي يفرض فيها كل نظام سياسي ، أو كل شلة تطفو على السطح داخل النظام السياسي الواحد ، مزاجها السياسي على الجميع؟
المزاج الليلة اشتراكية نديها كمان اشتراكية .. الميول ناصرية نلعن سلسفيل كل ما هو قبل الثورة .. اتكلمنا عن الديمقراطية و (...) الحراك السياسي نطلق على حقبة ما قبل الثورة اسم "الحقبة الليبرالية".. وما دام المود "فكر جديد وعبور إلى المستقبل" رش شوية شعارات على ما قُسُم على وش الصحن..وقَسِّم يا بتاع البسبوسة وادي كل واحد حقه..
الغرض طبعاً هو إرساء مبدأ (إوعى تعيشهم عليَّا ..إوعى عقلك يوزك).. حتى لا يفكر أي شخص على الإطلاق بعد أن يشب عن الطوق في الانضمام إلى أي تشكيل سياسي غير الحزبوطني ، حتى ولو كان حزباً سياسياً من الذين يسميهم إعلام الحزبوطني "أحزاب شرعية"..
ثم يحدثونك عن الحراك.. وربما يطلبون من الأطفال اليافعين كتابة مواضيع إنشاء سخيفة عن سي الحراك..
دكتور رابسو يا معلِّم .. خلِّي الغابة تتكلم .. والعبي يا ألعاب!
على جنب:قلبي مع كل اللي شاف مسلسل "الملك فاروق" أو قرأ مراجع عنه بعد كل اللي درسه عن الراجل في التعليم الرابسوماتيكي.. أنا عارف إن الـ shock حيبقى شديد شوية .. بس حنعمل إيه؟
على جنب:قلبي مع كل اللي شاف مسلسل "الملك فاروق" أو قرأ مراجع عنه بعد كل اللي درسه عن الراجل في التعليم الرابسوماتيكي.. أنا عارف إن الـ shock حيبقى شديد شوية .. بس حنعمل إيه؟
6 comments:
فكرتنى بكلمة كان قالها د. أحمد خالد توفيق عن موظف صحة بسيط ..
" يعنى أنا هيبقى فى إيدى القلم وأكتب نفسى حزين , لا والله لازم أكتب نفسى سعيد " !!
فما بالك بقى إذا كنت أنا قط وحرامى ؟
سبحان الله .. الواحد كان فاكر إن محمد صبحى فى مسرحية تخاريف كان بيهرج أو بيخرف أو بيبالغ حتى فى وصف الواقع بصوره كاريكاتورية ..
اتضح إن الراجل كان بيخفف علينا الواقع ! وإن اللى حاصل أدهى وأمر ..
وآل إيه كانوا بيعلمونا فى قصة الصقر الجرىء فى الإعدادى إن عرابى باشا صرخ فى وش الخديوى وقال إننا -أى المصريين يعنى - ولدنا أحرارا ولسنا تراثا أو عقارا .. وآل إيه كمان .. سوف لانورَث بعد اليوم !
تقريبا القصة دى اتلغت خلاص .. أو يمكن زودوا كلمتين صغيرين فى الآخر ..
إلا لمبارك
مع خالص عزائى ليك وللقربة المفوته على رأى بيللا
معلش ياسيدى .. دردشتى بره الموضوع شوية لكن كل المصايب دى مربوطه فى بعض زى ال3 مصايب بتوع عم نجيب الريحانى اللى ملضومين فى بعض ..
نخرج من مصيبه نلاقى التانية !!!
ليو:
برضه فاتتني القصص اللي كانت بتتدرس لنا.. دي كانت مسخرة.. من أول كتاب رفاعة الطهطاوي لقصة "كفاح شعب مصر"..لـ ... لـ .... وكله حسب المزاج السياسي..
كلها سنتين ونلاقي قصة من وحي "الفكر الجديد"..
من ورا لقدام
طبقا لسياستك في الردود
مسلسل فاروق اجبرني اتفرج ولو علي حلقة وافوت اتنين.. الاول بدات باحنا ليه مبنعملش مسلسلات حلوة كده علي طول
وبعدين تحولت الي احنا ليه مبنتكلمش عن التاريخ بالطريقة دي علي طول
علي كلام مكتبة مدبولي وجورنال الاخبار والاهرام كمان ان فاروق كان اسوأ ما مر بالمحروسة
المنهج علي مافتكر مكنش بيجيب سيرة اسرة محمد علي بحالها غير بالعافية.. عملوا حاجات وخلاص
---
كل سنة وانت طيب .. بمناسبة ان العيد خلص
:)
---
امممممم
عن تسييس التعليم
عندك طريقة مؤثرة اسرع من كده في تدجين الجيل الجديد. دي فرصة لا تعوض
ربي جيل انه لا نصر الا اكتوبر وان العدوان الثلاثي كان من الباب للطاق
هيطلعوا كده
فهمهم ان كل حاجة تحت رعاية الرئيس لما يكبروا مش هيتعبوك
غريب ان لسه مفيش كلام عن المستقبل والشباب داخل الحزب الوطني والكلام ده
اوقات باستغرب امتي هيبتدوا يعدونا للمرحلة اللي بعد كده؟
ساسو :
عودتك بعد العيد أضافت إليه يوماً رابعاً:-)
شوفي يا ستي..
الموضة في مصر بقالنا عقود هي تسييس كل شيء من الهواء للماء للفن وحتى كرة القدم.. وإن ما سيستش الحكومة الحاجات دي تسيسها المعارضة .. وإن ما سيسهاش دول إحنا اللي حنقوم بالواجب..
لكن في التعليم بالذات.. الحكومة عاملة اللي عليها وممارسة على طلبتها مبدأ "اكتب ما يملى عليك".. الإكليشيه اللي كان سائد في مراحل تعليمية سابقة..
تسييس التعليم بيتنافى مع أبسط مبادئ الديمقراطية السياسية اللي قاعدين ندور عليها من ساعة ثورة 1952 (سي المبدأ السادس قسم تاني حارسه) ومش لاقيينها.. بل إنه حيضرب مبادئ المنافسة السياسية بالشوز القديم.. لما حزب واحد هو اللي يملك وحده حق تسييس جيل بأكمله عن طريق خدمة يدفع ثمنها كل دافعي الضرائب (بمن فيهم اللي مش مستخفيين دم الحزب) و"مزخنق" المسائل على الأحزاب "الشرعية" برة المدرسة وفي الجامعة دة مش اسمه منافسة شريفة ولا تعددية حزبية ولا بتنجان أزرق!
المفروض التعليم يطلع ناس تعرف تختار.. تعرف تختار المواد اللي حتدرسها لما تدخل ثانوي .. والكلية اللي حتدخلها .. والمجال اللي حيشتغل فيه (إن أتيحت له فرصة ذلك) ..والناس اللي حيكملوا حياتهم معاهم .. والناس اللي حيحكموا بلدهم..
إنما كل شيء "إجباري" "إجباري"؟ احفظ التاريخ زي ما احنا عايزينه .. قول في النص الرأي اللي احنا عايزينه .. اسمع كلام لايون كنج وما تسمعش كلام الناس التانيين .. هوة احنا في سبوع؟
بالمناسبة ..
1-من أقمأ ما كتب في كتاب تاريخ ثانية-ثالثة ثانوي ما كتب عن التعليم المصري قبل الثورة .. ومثله ما درسناه في التاريخ في ابتدائي أو إعدادي عن تعليم ما قبل الثورة.. وتحضرني عبارة "كان التعليم هدفه تخريج مجموعة من الموظفين" في معرض انتقاد التعليم في تلك الفترة.. لا تعليق..
2-في نفس الكتاب .. لم تذكر فترة الرئيس الراحل أنور السادات بأي شيء.. كل ما ذكر سطور طويلة عن مبادئ الثورة والدور العروبي لمصر في المرحلة الناصرية والعهد المباركي..
3-التسييس مستمر إلى ما بعد ذلك .. نشرت عشرينات منذ عام صورة لبطاقة يوزعها الحزب الوطني مع "بطاقة الترشيح" التي تلي النتيجة النهائية للثانوي وتصل للطلاب على عناوينهم بالبريد!
والمدهش أنه حتى لحظة كتابة هذه السطور لم يهتز رمش لصحفي واحد أو لكاتب واحد في هذا الموضوع رغم أن ما نشر هو صورة وليس تخرصات أو "أوشاعات مغرييييضة"..
وطبعاً ما تنسيش جمعية "جيل المستقبل" في الجامعة .. وما أدراكِ ما "جيل المستقبل"..
:)
طبا قولك ايه بس ..جيت اشوف التعليق احرجتني تماما بذوقك كالعادة
قبل مانس انا لسه جايه من تماحيك
بوست الراديو سكتني تماما
وانا من انا من علاقتي بالراديو
سرحت كتيييييير وبعدين فتحت غنوة قديمة كانت بتيجي كل يوم علي الراديو وجيت
--
فكرتني بجيل المستقبل لسه الورقة المربعة معايا بتاريخ التقدم للسادة في مبناهم الزجاجي الشيك بزيادة في الكلية
تعالي نتكلم بالحق شوية عن التعليم.. اي نظام بيفرض رأيه بنسبة في التاريخ، مابالك بنظامنا السعيد
ناس كتير بتفترض ان مبارك بيفضل اسقاط فترة السادات اصلا من التاريخ.. الاسدات يعني حرب اكتوبر وبس
الانفتاح وكامب ديفيد فترة الغاز بالنسبة لكل اللي تحت ال20 ميعرفوش عنها غير شوية الأفلام اللي فيها المزارع راجع من الخليج بستيريو والشقق غليت وبس
يعني السادات وحش بس عسكريا نجحنا واول طلعة جويه فتحت باب الحرية زي مانت عارف. اما ناصر فهو الكل في الكل والعدوان عليه كان مفاجاة
صحيوا لقوا 3دول بتحاربهم
---
مش هتتصلح الا لما يتصلح التعليم.. يظهر ان احنا وهما عارفين كده
Post a Comment