Friday, December 15, 2006

انت واخد بالك ليه؟

بمناسبة ما يقوله حضرة رابسو عن أن مناهج التعليم الثانوي سيتم تطويرها طبقاً لمقررات مؤتمر التعليم الثانوي (والذي كان الرابسوهات السابقون نائمين منذ انتهائه) .. أهدي علامة استفهام صغيرة..

بغض النظر عن الطريقة الغريبة التي يتم بها تحضير الخلطة الكنتاكية السحراوية لمناهج اللغة العربية للمرحلة الثانوية عموماً ، وفي الصف الثالث.. هل التفت الوزير لوجود موضوعين للقراءة متناقضي المضمون؟

صدق أو لا تصدق .. الموضوعان الموجودان في كتاب القراءة للصف الثالث الثانوي هما "قضية السكان" للدكتور محسن توفيق ، والآخر هو "سقط القناع" وهو مقال للعالم الراحل الدكتور أحمد مستجير..

في الأول يدافع الكاتب عن الحاجة الماسة لكبح جماح الانفجار السكاني ، أما الموضوع الآخر فيعتبر ذلك ضمن مخطط تدعمه دوائر صنع القرار والأعمال في الغرب للحد من سكان الدول الفقيرة!

زيادة في التوكيد .. أطلب من أي شخص منكم له قريب في الثانوية العامة أن يقرأ النصين..

ويبدو أن الشعار المتبع في وضع تلك المناهج ، التي نظم الرابسوهات مؤتمراً فقاعياً ممولاً من أموال دافعي الضرائب المشاركين مجتمعياً وضعت توصياته في المكان التي توضع فيه توصيات القمم العربية ، هو شعار "حد واخد باله؟".. ورغم الصراخ والعويل بأن الهدف من النظام التعليمي هو خلق عقلية نقدية لدى الطلاب .. إلا أن شخصاً من القائمين على المنهج لم يعمل حساباً لطالب "لِمِض" يسأله عن علاقة الموضوع الأول بالموضوع الثاني.. وطبعاً من الصعب على المعلم أن يشرح له العلاقة بين الموضوعين بما أنه ليس لديه تعليمات بذلك ، ولن يشرحها للطالب المدرس الخصوصي بما أن العلاقة بين الموضوعين من المستبعد ظهورها في الامتحان!

قد يرى البعض أن للدكتور محسن توفيق أسانيده ، وللدكتور مستجير أسانيده .. لكن شعوري الشخصي بأن الأمر ليس مقصوداً منه وضع رأي بجانب رأي وإثارة حالة من التفكير لدى الطالب .. فكل التفكير طبقاً للنظام الرابسوماتيكي مصمم على صم الكتاب بحذافيره وبأرقام الصفحات إن أمكن!

ربما القائمون على مناهج لسان الضاد "ما خادوش بالهم" .. مثل الطلاب المحشورين بين مطرقة المناهج وسندان التنسيق والأهل والمدرسين.. وربما لو فكر أحدهم قد يلقى مصير آلاء مجاهد قبل التدخل لإصلاح المهزلة ، أو يتم حبسه في غرفة الفئران مع الغولة المذكورة في حوار مسلسل حدائق الشيطان..ربما لا يجب علينا أن "ناخد بالنا" أيضاً حتى رغم إنهاءنا للعقوبة التعليمية منذ فترة طويلة..

وربما يتطور الأمر ليصبح "أخذ البال" عملاً منكراً .. ويصبح "انت واخد بالك؟" استفهاماً غرضه البلاغي الإنكار!

5 comments:

rony said...

احم اولا احب اصحح حاجه
الهدف من التعليم " خنق امخاخ الطلبه وتدمير جيل جديد قد يكون قادرا على التطوير والابتكار علشان احنا منفهمش غير فى الممبار "
وتانى حاجه احب اقولك ان الهدف من وضع موضوعين فى القرءاه مضادين لبعض تأكيد حريه التعبير عن الرأى وانه يوضح للطالب ان ده قال رايه وده قال رايه ومحدش اتقبض عليه غير اعضاء كفايه والاخوان
وتالت حاجه سيبك من العربى ولغه الضاد خلينا فى اللى الاجانب هايشوفه ....اكتشفت مؤاخرا اوى ان الانجليزى اللى بدرس فيه من وانا فى kg1
غلط من ال a to z
هاتقولى ازاى ...هاقولك اتدخل قاعه ازاى كورس انجليزى فى حته محترمه هاتعرف اننا بنتكلم انجيلزى مصرى
واخيرا انا خايفه عليك من التعليم
ده سكه اللى يروح ينسى اللى عرفه ويرجع

قلم جاف said...

شوفي يا روني..بداية مرحباً بيكي هنا بما إن دة أول تعليق تقريباً أو التاني مش فاكر بالضبط..

كان فيه مسلسل كوميدي اسمه "مطلوب عروسة" .. حذفت فيه الرقابة بأوامر المجلس القومي للمرأة عبارة لأحمد بدير بيقول فيها لخطيبته إنه نفسه يخلف 11 ولد!

أفهم من دة إن تنظيم الأسرة توجه حكومي ولو بالعافية والحذف من المسلسلات حتى في عبارة هزارية عابرة مش حيشكل وجودها خطورة..

وزارة الإعلام اتشطرت على عبارة ، وزارة التعليم مش عارفة تفكر في موضوع قراءة مكون من صفحتين ولا تلاتة ..

حيطمنك التعليمجية ويقولولك إن الموضوع مش مشكلة وكل من اللي ع الترابيزة واربط الدونكي مطرح ما يقول لك صاحبه .. عندهم حق لأنه مش مشكلة بالنسبة للصمام .. أما اللي بيفكر فدماغه حتوجعه ومش حيلاقي حد يفهمه ولا يدلعه حتى!

للدرجة دي أصبح التفكير طبقاً لنظام التعليم الرابسوماتيكي ضار جداً بالصحة ؟ وأصبح سي التفكير النقدي يندرج تحت بند "الكلام دة أدامك"؟

وعن اللغة "الإنزليجية" التي نتعلمها في المدارس .. لينا بإذن الله كلام..

camera_girl said...

انت دمك خفيف...اه والله اسلوبك ساخر بس جامد لما دخلن البلوج بتاعك منكرش حسيتو وجبه دسمه اوى على واحده جاهله زى حالااتى لكنى ادينى قريت موضوع واستفادت بجد حتى من اراء الناس الى عندك

smraa alnil said...

يا عن قلن يعني هي جت علي دي
فكرتني بايام ما كنت في الثاوي وكنت باخد درس
فانا كنت شاطرة اوي في البلاغة بحكم اني بكتب شعر وبعرف اتذوق شوية
فبصراحة مش كنت بذاكرها
ففي مرة المدرس طلعلي بيت شعر وقالي طلعي فيه الاستعارات
الراجل اتصدم مني وقالي ايه يا بنتي كل دة
قلتله ايه هو صح ولا غلط
قالي لا طبعا صح
بس اللي انتي بتقوليه دة مش مقرر عليكي
المقرر هو كذا وكذا وكذا
واوعي تكتبي رايك دة ي الامتحان
؟؟؟؟؟؟؟؟؟؟؟؟؟؟؟؟؟
تقول ايه بقي
دة مش بقي رابسو وبس
خليني ساكتة
يا سيدي مذبوح ومفصول وساقط من يفكر

قلم جاف said...

سمراء النيل :

مرة كنت كتبت هنا مقال اسمه "مشيئة الوزارة" .. ودة بيرجعني لإفيه قديم جداً في فيلم للريحاني لما التلميذة سألته : هو الأسد بيتكلم؟..

للصدفة ، الكلام دة كان في حصة لغة عربية زي ما بيبان من سياق الفيلم!

لا وشفتي السآلة في المسألة .. في مواد زي التاريخ يدوا السؤال دة :

ماذا تقول لمحمد علي بعد حروبه في الجزيرة العربية؟

أقول له إيييييه .. أقول له آاااااه..

طالما إنتم محفظينا في كتبكم رأي ، عايزين رأينا ليه؟ .. دة أسخف من السئيل اللي جايب ساعة جديدة وكل شوية يحطها في عين الناس اللي ماشية في الشارع ويقول لهم : الساعة كام؟

camera girl:

أولاً أهلاً وسهلاً بما إن دي زيارتك الأولى للمدونة واللي كان ليكي فيها ردين هنا وفي الموضوع اللي قبله "يسري الجمل يتحدى الملل ..الخ"..

وثانياً ربنا يخليكي ،ويخليني على مستوى الكلام الكبير جداً عليا اللي انتي قلتيه .. أتمنى تكرار زياراتك وتعليقاتك .. كلنا بنستفيد من بعض كتاباً ومعلقين في فضاء التدوين الفسيح..